Eyjalíf - myndlistarsýning eftir Reyni Vilhjálmsson

EYJALÍF

MYNDLISTARSÝNING Í NORSKA HÚSINU Í STYKKISHÓLMI - OPNAR 21. MARS KL. 14:30.

Myndlistarsýningin er haldin í tengslum við Júlíönuhátíð sem haldin er 20. til 21. mars.

Á sýningunni verða vatnslitaverk eftir Reyni Vilhjálmsson landslagsarkitekt og vatnslitamálara.

Reynir lést 7. júlí 2024 á nítugasta aldursári.

Verkin á sýningunni eru öll frá Breiðafjarðareyjum.

Reynir dvaldi oft í Galtarey á sumrin síðustu 20 ár ævinnar, þar naut hann sín vel og kallaði hann Galtarey paradísareyju.

Verkin á sýningunni eru að mestu upplifun Reynis á hinni undurfögru nátturu Breiðafjarðar þar sem sjórinn flæðir í margbreytileika sínum og straumarnir eru á ferð út og inn fjörðinn og gera það að verkum að landsýnin er síbreytileg.

Reynir fór að leggja stund á vatnslitun þegar hann nálgaðist sjötugsaldurinn og hafði afar góða leiðbeinendur en Reynir var einnig fær teiknari og náði fljótt góðum tökum á vatnslitnum.

Reynir lærði sitt fag landslagsarkitektur í Kaupmannahöfn við Konunglegu akademíuna og starfaði mestan hluta námstímans við skipulagsvinnu og teikningar jafnframt náminu. Eftir heimkomuna stofnaði hann sína eigin teiknistofu sem í dag heitir Landslag.